... اول يوم🌻
الكاتبة_الشاعرة أ. الهام شعبان
🍀🍀🍀🍀🍀🍀🍀🍀🍀🍀🍀
******أول يوم دراسة زمان ******
رن المنبه الصبح الساعة ستة
وريحة الشتا والجوافة في كل حتة
واذاعة القرآن الكريم مونسانا طول الليل
ونفتتح يومنا بصوت الحصري وأحسن ترتيل
وأوام نلبس المرايل وهي جديدة ومكوية
ولازم معلقة عسل أسود وليمونة معصورة بحنية
وماما تِسَرّحْ شعرنا وتلمه في ضفاير
وكله بفن من غير شخط مش أي حاجة على الطاير
وتوكنا شرايط ستان بيضا وفيونكات وشرابات وإوعى تنسى الشنطة
وإخواتي الولاد واقفين لبابا إنتباه وبيربط ليهم الكرافتة
أصله طول عمره في عمله ولبسه فنان مش كده أونطة
والست بتغني يا صباح الخير ياللي معانا
وكوباية المية والسندويتشات في كيسة ويانا
وتعليمات أبويا وتوجيهاته ويعيد ويزيد لننسى حاجة
ونظرات أمي وحنانها وخوفها علينا وحقيقي بكون لحُضنها محتاجة
وكله بيجري علشان يلحق التختة الأولى أو بالكتير التانية
ونحلم بعد كل حصة ونقول أكيد الفُسحة الجاية
ونكمل اليوم بكل أمل وجوانا كتير أحلام
وفي آخر حصة وجرس نجري على البيت أوام
واستقبال أمي لينا بكل فرح وحنان
ودقية بامية باللحمة وجنبها مخلل بتنجان
والحلو رز بلبن وبلح رُطب ورمان
وكانت طلباتنا كام كُراسة وكام كشكول
ويوم ما نقول صرفنا كان كبيرها قلم بسنون
والجلاد يومها ما كان ب جراب
كان فرخ واحد يكفي كل الطلبات
وكان كل واحد فينا عارف اللي له واللي عليه
مش تعالي يا ماما إشرحي دي وأحل إيه
وكانت سندويتشاتنا جبنة وبيض وبطاطس بوريه
ولا كنا بنتأمّر ولا نعرف بُرجر وبانيه
ولا كان فيه حاجة إسمها سبلايز
والله من يوم ما عرفناها والتعليم بايظ……
الهام شعبان
تعليقات
إرسال تعليق