... الأقصى ينادي🌻
الكاتب_ الشاعر أ.أحمد السعيد الفقي
الأقصى ينادي
لحظة من فضلك
نفسي أفضفضلك
وأبوح باللي جوايا
الشعب العربي
قول وأنا سامعك
في قلبي مكان سايعك
ومستعد أسمع منك
ألف حكاية وحكاية
الأقصى
يرضيك اللي بيجرالي
يتشردوا أهلي وعيالي
وإنت واقف بتتفرج
أعلنوها حرب إبادة
وإنت بتقول أنا مالي
لكن أرضي ولادة
أبطال فوق العادة
رجالة وقت الشدة
سدادة
عملوا اللي عليهم
وزيادة
يا إما نصر يا إما شهادة
الشعب العربي
وأنا إيه اللي في إيديا
غلبان والدنيا جاية عليا
لا ورايا ولا قدامي
وفيه كتير زيي
بس بتتغير الأسامي
الأقصى
لأ في إيدك كتير
وتقدر تصنع معجزات
طول ما في قلبك الخير
وضميرك لسه صاحي
اصرخ كفاياك سكات
علي صوتك
خليك في صف الحق
ولو أعلنوا موتك
إطلع من تابوتك
زلزل الأرض تحت أقدامهم
خلي الجبل ينشق
الشعب العربي
إنت بتحلم
وحلمك مش على مقاسي
لا أنا ولا كل ناسي
إحنا يدوب
نمشي جنب الحيط
نجعجع
نزيط
وقت الجد
متلقاش حد
الحيط يتهد
الخوف يتمد
على بعض
نقوى ونشتد
وعلى غيرنا
آخرنا
شوية تنطيط
الأقصى
يا خسارة
كنت فاكر لي
عزوة و سند
وقت الشدة
يبقوا ضهر
عليه أتسند
لكن أنا بطلب
من مين المدد
إنتوا كغثاء السيل
مجرد شوية زبد
وفي الأخر طلعتوا
كمالة عدد
أحمد السعيد الفقي
تعليقات
إرسال تعليق