الأستاذ.. جمال زكى عينر.. يكتب..(هاتي إيدك ) :.
(هاتي إيدك ) :
هاتي إيدك وامسكي في إيديا
راح نبدأ مشوار الدنيا
وإن ما وصلناش المرة دي
راح نوصل في المرة الجايه
هاتي إيدك إوعي تخافي مني
ده انا منك وإنتي اكيد مني
يعني اللي حيرضيكي يرضيني
واللي يضايقك حيزعلني
ايه رأيك لو مرة مشينا
ونفكر سوا مع بعضينا
نعمل ايه ف ايامنا الجاية
نرسم على ارضنا خطاوينا
نرسم دنيا ماليها الفرحة
زي عروسة ولابسة الطرحة
نرسم بسمة لكل الناس
نرسم شجرة بالخير طارحة
لما تكون الإيد في الإيد
حنقرب من كل بعيد
وماحدش حيفرق بيننا
نتلاقى من غير مواعيد
هاتي إيدك وتعالي نقول
ابعد عنا وروح يا عزول
مش حتأثر أبداً فينا
حنكمل مهما انت تقول
هاتي إيدك واضغطي على إيدي
خلي الدم يفور في وريدي
علشان نبضي يحس بنبضك
وحروف اسمك تبقى نشيدي
هاتي إيدك وإمسكي ف إيديا
راح نبدأ مشوار الدنيا
وإن ما وصلناش المرة دي
راح نوصل في المرة الجاية
إن ما وصلناش المرة دي
راح نوصل في المرة الجاية
بقلمي الشاعر جمال زكي عينر
تعليقات
إرسال تعليق