الأستاذة... إلهام شعبان.. تكتب...آه يا بلد
آه يا بلد كُنت فاكرك وطن
وآه يا وطن إشتقت فيك السكن
ضاع فيك أمل الولد
والحلم فيك إتوأد
كُنت فاكرني عندك حبيب
وإنت بتواسي الغريب
كُنت بخاف عليك من الضياع
وإنت واقف وسط السِباع
كُنت بهديك الحنين
مهما بَعَدِتنا السنين
وآتاري حِماك ليا كان خِداع
وظُلمك ليا كان مُشاع
وشِلت وحَطيت عليا الطين
وهان عليك دمعي الحزين
فيك الخسيس بقى له تمن
والأصيل ما لاقي فيك عمل
وابن الوزير دايماً في الصورة
وابن الغفير بيلعبوا بيه الكورة
إنت الحقيقة والسراب
إنت العدو وكل الأحباب
ماأعزِش روحي عنك فِداء
ولو شُفت فيك كل العذاب
كُنت بدافع عنك تحت القصف
وإنت بتهني بكف ورا كف
بشوف في شوارعك كل الأمان
وإن كُنت عارف إني ماليش مكان
عِشقت فيك طينك وشَمسك ومايتك
وهربت منك فيك من ظُلمك وقسوتك
ودايماً قلبي شاريك
وناسي إني فيك شريك
وفي شِدتك بس قلبك فاكرني
وفي شِدتي أنا دايماً بايعني
ليه عادة فيك بتزيد همي
وأنا أفديك بروحي وبدمي
وبره الحدود ..قلبي يدوب
بفرح لنجاحك وأرفع العَلَم
وإنت بتستخسر فيا الورقة والقلم
بسأل ليه دايماً خاذلني
وإنت إسمك بس وحده آسرني
كُنت فاكر بقسوتك ليا إني هتعلم
بس غِلطت كتييير والجرح أهو مَعلِمْ
ودموع أُمي الحيرانين
ودعاوي أبويا الطيبين
مفرقوش معاك وأنا فيك سجين
أروح فيك لمين أشكي الألم
وإنت فيك الخِصم وايا الحَكم
الهام شعبان
تعليقات
إرسال تعليق