.... حب عمري🌻
الكاتب_ الشاعر أ. وليد حسانين
🍀🍀🍀🍀🍀🍀🍀🍀🍀🍀
" حُبْ عُمْرِي "
للبلياتشو!!
بُعْدِي عَنكِ كان قرارِكْ والغياب عاش ف انتظارِكْ
كُلْ ما أسأل فين وعودِكْ تِبْكيِ وتقُولِي اِختِيارَكْ
يُومها قالوا عِينْهَا مِنَكْ وفْ دموعها اِنتصارَكْ
لَما يُوم سألوني عَنِكْ قُلْتْ واللهَ كوتْنِي نارِكْ
سِكِتِي سِكِة خُطاكِ خَطوة ورد وخَطوة تُوتْ
والطريق يِحْلِفْ هواكي أغلى شيء فِ الوجودْ
سِكِتِي إيه غِيرْ رِضَاكِي والرِضَا وِدْ وجُودْ
لسه بسمع صوت نِداكِي وفْ صَداه اِرجعلي عُود
نَظْرَةَ واحدة من عِنيِكِي تِشْفِي قلبي م الِجراحْ
لَمْسَة دَافْيَة من إيديكي يِرْجَعْ العُمر اللي رَاحْ
كُلْ حاجة مني فيكي كُلْ حاجة فيكي مِني
إنتي لو بَصِتْ عِنِيكي. تِلقي بُعدي غصب عني
إنتي حبي وجنوني أجمل ما هداني ربي
ساكنة أفكاري وظنوني هو حُبِي ليكي ذَنْبي!!!؟
عايشةَ أفراحي وشجُوني عُودي ليا كُوني جَنْبي
عارفة لو غََمضِتْ عيوني بلقى حُبك لونه بمبي
تِسوا إيه الدُنيا دُونِك طب وليه أعيشها تاني
رَغْمْ حِيرْتِي من ظُنُونِكْ لسه عايش ع الأماني
هي غِيرْتِي نفس غِيرْتِكْ والكلام هو الكلامْ
والبنات جايبين فِ سِيرْتِكْ ع الربابة وفِ الزِحامْ
اِرْجَعِي متهَدِدِيش إنْسِي عِنْدِكْ إنْسِي عِنْدِي
واوعِدِكْ إني هاعيش بين زهور الحب وردي
مِدي إيدك متخافيش فوق جسور الحب عَدِي
مشتريكي متبعيش حبي ليكي مش بِيَدِيِ!!
شعر عامي
للبلياتشو
وليد حسانين
٢٩/١٠/٢٠٢٤
القاهرة / مصر
تعليقات
إرسال تعليق