.... فطوووم 🌻
الكاتب_ الشاعر أ. عاطف كبارة
🍀🍀🍀🍀🍀🍀🍀🍀🍀🍀🍀
فطوووم
عاطف كبارة
..............
كانت صغيرة وقلبها
قد السحاب
لسة بضفيرة وسنها
عز الشباب
كانت بتغزل م الحروف
توب السرور
تتدفى بيه من كل خوف
وتشوفه نور
كان نفسها تعيش حلمها
ف حدود وطنها وأرضها
تتهنى بالخير والثبات
وف حضن ابوها وأمها
تكبر قصاد عيني أختها
زي ما كل البنات
فاطمة ماتت من سكات
آسفين يا بنتي ...
آسفين يا بنتي إن حلمك
مش حقيق
هدموا عليكي البيت وانتي ...
لسه ف بداية الطريق
أنا مش بريء
ولا حد فينا عمره يوم
حيكون بريء
هدموا عليكوا البيت ............. واحنا نايمين ف التابوت
متحنطين ..
بنستخبى ف ضل حيط
إنتوا اللي عيشتوا ......
واحنا متنا من سنين
كام فاطمة ماتت زيها
كام أم سابت بنتها
كام ألف اخت وأب ........
مدفون جنبها
خلص الكلام من وقتها..
خلص الكلام وقتها
والصمت شيء محتوم
حلم البراءة انتهى
والكل بات مظلوم
والبنت بتشوف أختها
مدفونة تحت حطوم
مافضلش غير إسمها
تنطق بصوت مكتوم
تنده لفاطمة تقول لها ..
مع السلامة يا فطوووم ..
الوداع
عاطف كبارة
تعليقات
إرسال تعليق