....قوللي يا بحر🌻

 

  الكاتب_ الشاعر أ.  جمال زكي عينر

🍀🍀🍀🍀🍀🍀🍀🍀🍀

(  قوللِّي يا بحر  ) :

قوللِّي يا بحر وعَلِّي الصوت

ليه ف أحزاني سايبني أموت

موجك يلفح يرزع فيَّا

ونهارك ما ظهر له خيوط

بين شطين أنا فيك محتار

لا انا في الجنة ولا في النار

لا انا غرقان ولا عارف أعوم

حَيَّرت ف عقلي الأفكار

قول سَمَّعني يا بحر الصوت

قوللي يا بحر كفاية سكوت

قوللي حكاية وقول حدوتة

ع السلطان وعلى الهلفوت

ياما سمعت كتير حكايات

مجنون عايش عاقل مات

والمجانين كتروا الأيام دي

بقى ليهم معجزة وآيات

قوللِّي وزوِّد أوي في القُول

يمكن ألاقي كلام معقول

وإن ما مشيش ويايا كلامك

يبقى حوار كان في المجهول

قوللِّي يا بحر إحكيلي كتير

قول وانا مش محتاج تفسير

أنا حاسمع ولا أكِنِّي سمعت

إوعى تخاف انا سري ف بير

ولا أقولَّك إسمع مِنِّي

إنت يا بحر مش أعقل مِنِّي

ده أنا إنسان علمني الخالق 

أصنع فُلٰك بعلمي وفني

وبطوف بيها بلاد وبلاد

عمرك ما حتبقى الجلاد 

حتى إن مُت انا برضه فايتلك 

أولادي وحفنة أحفاد 

                      جمال زكي عينر