...العيب فلمرايا🌻
الكاتب_ محمد دومو
🍀🍀🍀🍀🍀🍀🍀🍀🍀
العيب فلمرايا!
(زجل مغربي)
سبحان الله من ناس كلها تعياب
ما شافت صورتها فلمرايا
بكلامها لخبيث ومقابلة الأبرياء
لا عفة تلقاها ولا عناية
تتكلم فالدين غير تدراݣ وحجاب
والنفاق خصلة ودراية
الفتوى تخرج من فامها بلا حساب
وتنسى فعايلها الظالمة
الدين غير كلام وصلى وجواب
والمعاملة تركوها نايمة
بلا تربية تنفع لحباب والصحاب
غير الغش والهدرة الخاوية
ما تحشم ولا وجه عندها يتصاب
وتحسد فالناس المزيانة
النميمة كثيرة ولكذوب مع لفساد
لسانها حر من العافية
نفوسها متدمرة وتعيب فلعباد
حياة كلها شوهة وشفاية
العيب فيها كثير وبلا حساب
كتشطن عقولها النايمة
عايشة فوكر الخنز وتقلد لسياد
توهم نفوسها العيانة
الله ينجينا من شرور هاذ الحساد
ومن قلوبها المغيارة
تخاف ما تحشم حياتها كلها عذاب
الجبهة وقلة النطيح كباش هوارة
لا حيلة تنفع معها من غير التجناب
لا تسالمها تلقى السلامة
ما توقر لا كبير ولا صغير مصواب
وجاه النحس وشغلات لمسالية
لا قيمة تصلح وساطها غير التخراب
رفاݣتها ليك سبة ومعيارة
تشتم وتعاير والمعيور فيها وزاد
كلامها كريه تݣول مزبالة
التلفة مدوخاها كثير وبدون تعداد
بحال لغراب لي يقلد لحمامة
الزين يحشم على زينو يݣولو لجواد
من فعايلو الواضحة والباينة
والخايب غير إلى هداه الله ويتݣاد
المعݣور مقابلتو للناس مداومة
-بقلم: محمد دومو
-مراكش/ المغرب
تعليقات
إرسال تعليق