الشاعرة... إلهام شعبان.. تكتب... أهو جه يا ولاد.
أهو جه يا ولاد ..أهو جه يا ولاد
شهر البركة و الدعوات
ولمة العيلة والحلويات
كان لينا فيه زمان ذكريات
نرجع شوية لعمر فات
لما نخلص رجب وشعبان
ونستنى هلاله في السما يبان
ونلتف كلنا حوالين التليفزيون
ونستنى الشيخ يقول بكرة هنصوم
ونجري على أهالينا نهنيها
وأصحابنا وحبايبنا وكل مالينا
وننزل أوام نجيب السحور
واوعاك تنسى طبق الفول
ونرجع نطمن على زينتنا في البلكونات
ده تعب أيام قص ولزق من الكراسات
ونصحى من بدري فايقين
ده صيامنا صحة وعفة ودين
وإن قابلنا في اليوم مسكين
نعطيه ونقول ده رمضان كريم
والولاد مع أباهتها في المسجد
والبنات في البيت بتجهز وترتب
ويحين وقت الفطور
في أول يوم الكل ملموم
ولا نشكي من فقر وهموم
والخير كتير ولا في ديون
والبركة في البيت بتزيد وتدوم
وتجري بينا الأيام
ونتسابق على ختم القرآن
والقيام والتهجد والناس نيام
والصلاة في وقتها في جماعة
أفضل من صحبة خداعة
ولينا بعد الفطار حكايات
من فوازير وكوميديا وإفيهات
واوعى تنسى فطوطة وبكار
وحوار صريح دايماً من نار
وألف ليلة تسرح بينا
لخيال يحلي ليالينا
وفي آخر عشرة أيام
فين ليلة القدر يا جدعان
نشكي لربنا وندعي ونقول
يارب ما تسيب فينا محروم
وفرحنا بكل الخير
ده ربي على كل شيء قدير
ولا ننسى أبداً بيت ستي
وفرحة خالتي وأمي وأختي
واللي ساكن قريب وبعيد
الكل بيحضر لكحك العيد
غُريّبة وكحك وبسكوت
وفطارنا أي حاجة والكل سكوت
وشباب العيلة روح خد وهات
وإمشي براحة لا تقلب الصاجات
وبسرعة تيجي ليلة العيد
والكل في الشارع فرحان وسعيد
ونلف على المحلات ونعيد ونزيد
ونجري على البيت نفرش سجاجيد
ونختم القرآن وندعي للعبيد
يارب خلي الكل سعيد
وننام في حضن لبسنا الجديد
الهام شعبان
تعليقات
إرسال تعليق