الشاعر.. أيمن نصر.. يكتب...السيما.
( السيما )
بقلم ( أيمن نصر )
**********************
التذكرة كانت ببلاش
في الإعلان قبل المونتاج
إلحق يا ابني ماتنساش
فرفشتك... والله ماتغلاش
فيلم السيما سعرة بلاش
والدعوة عامة لكل الناس
لأهل الصفوة و الأوباش
قولت جوه السيما
فرصة عظيمة
أنسى مشاكلي أحس بقيمة
أحس إن أنا موجود وسعيد
أحس بفرحتي يوم العيد
لما كنت طفل جديد
دخلت السيما بقلب حديد
جوة السينما لقيتني مشاهد
رغم العتمة فضلت أنا قاعد
وانا معرفش أي مشاهد.
جوه السيما حسيت بهزيمة
سمعت موسيقى قالبة حزينة
زادت وجعي وجعين فوق وجعي
شوفت الفارس مهواش فارس
شوفت الحلم قلب لكوارث
شوفت الشهم إتلموا عليه
كل الواغش إتكاتروا عليه
شفت البطل مغلوب على أمره
والكومبارس بيزيدوا مواجعه
بطل السيما حب البطلة
حُب الفارس لأحلى مُهرة
كانت بنت زي القمرة
بس نهاية حبة مُرة
أصل حبيبته سافرت بَرة
وباعت حُبه ووعودها الحُرة
شفت الفيلم بقى شبه الواقع
بيت الحلم سقفه واقع
شوفت الظلم مالهوش مانع
شوفت الحق في طريقه موانع
شوفت الصادق مبيسدقش
شوفت الرحمة راكبة النعش
شوفت الندل عاملينه وحش
شفت حلال الناس بتصده
شفت حرام الناس بتلمه
شوفت الوفا بقى موضة قديمة
شوفت الغدر عنده عزيمة
شوفت إنسان مالهوش قيمة
نهشوا فيه بكل عزيمة
وفجأة صرخة عظيمة
طلعت مني ..
طلعت مني غصب عني
ليه الفيلم من غير مونتاج ؟!
ليه الفيلم من غير مونتاج ؟!
فيه أخطاء في الفيلم عميقة !!
دي ڤانتازيا ولا دي حقيقة
الشاشة ألوانها غميقة
الضحك اللي قولتوا عليه
ليه عَيط وبَكِيتوا عِنيه
الكوميديا ليه لونها إسود
والحزن سايق و بيحود
وبيركن ف القلب المتعَود
ع الحزن وليله الإسود
الشاشة مفتوحة ع الشارع
مفيش حاجز بينهم مانع
مش قولتولي الواقع مظلم
مش قولتولي مش هاتألم
واللي هاشوفه جوة السيما
حكايات تانية سعيدة بهيجة
وفضلت أصرخ صرخة عظيمة
عاوز أخرج بره السيما !!
عاوز أخرج بره السيما !!
قالها واحد ساكن فيّه
كل ملامحه جوه عنيّه
لما تحطوا مرايا غبية
قدامها او ترسموا فيّه
كان أمانيه يعيش حرية
كان أمانيه عيشة هنية
كان أمانيه يقابل ناس
كان أمانيه يشوف إخلاص
كان أمانيه يقابل ناس
لكن الناس
طلعوا مش ناس.
وجوه السيما ... وبرة السيما
طلعت دنيا قصصها أليمة.
بقلم ( أيمن نصر )
دمتم في رعاية الله.
تعليقات
إرسال تعليق