الشاعر.. أيمن نصر.. يكتب... المسحراتي.
( المسحراتي )
بقلم ( أيمن نصر )
*******************
( اصحى يا نايم )
( اصحى يا نايم )
( وحد الدايم )
(وحد الرزاق )
(رمضان كريم )
(مسحراتي )
( منقراتي )
بناجي روحي
أداوي جروحي
وساعات بهاتي
أنسى آهاتي
مغنواتي
لكن حزايني
أطبل شوية
أغني شوية
تبكي عنية
أصعب عليها
تصعب علية
تورم شوية
تبكي شوية
تنزل دموعي
يمسحها كمي
فينك يا أمي
ياما شيلتي همي
تزيلي دمعي
ده الكم داب
من العذاب
وانسى واطنش
في غلبي أهمش
يمكن تفرفش
حياتي ترمش
للحظ يكبش
أدوق هناوة
أنسى القساوة
أزق وقتي
يمكن تعدي
ساعات حياتي
والدنيا تمشي
ألاقي ساعتي
تركن ما تمشي
أناديها أطبل
إمشي يا ساعتي
مظلوم يوماتي
روحي بآهاتي
ده السعد آتي
العيب ده منك
ولا الساعاتي
إمشي يا ساعتي
مشي العقارب
خلي حياتي
يبقالها قارب
أعدي أأدف
في همومي أحدف
معرفش أشكي
أعمل فلايكي
أرمي شبايكي
ف أجدعها مينا
أعمل سفينة
وانسى الهزيمة
وأصطاد في بختي
بشبكة قديمة
يطلعلي فردة
جزمة قديمة
إصحى يا يائس
يا يائس إصحى
( وحد الرزاق )
( رمضان كريم )
منيش عويل
بجسم فيل
لكن عيوبي
قلبي كبير
وحظة هزيل
كان لونه ابيض
حرقوه حبايب
صار لونه أحمر
م المصايب
صار حظة خايب
صادف هوايل
يطبط يحايل
ولا عمره طايل
قلب شبيهه
كل اللي حبه
دايما يسيبه
و م الغدر سيل
لكنه أخضر
يعيش يعمر
أبدأ ما يغدر
وتملي يسطر
قصصه الجميلة
إخلاصه مرمر
ووفاؤه عنبر
تنزل دموعه
بحبر أحمر
تكتب دموعه
كل شجونه
ولا عمره يمكر
إصحى يا طيب
يا طيب إصحى
( وحد الرزاق )
( رمضان كريم )
قلبي ده نونو
بيعدي يومه
وينسى همومه
وكل يوم
يهل جديد
يغسل همومه
وحزنه العنيد
يشيل يطيب
قلبه المريض
وبالمداوية
يصير جديد
يعيش كإنه
مولود جديد
او حد تاني
حظه سعيد
أبدأ ما صادف
من المعارف
جبل قسية
أو غدر مية
م الحبايب
إصحى يا يائس
يا يائس إصحى
( وحد الرزاق )
(رمضان كريم ) .
.......................
بقلم ( أيمن نصر)
دمتم في رعاية الله.
تعليقات
إرسال تعليق