الشعر حلال.. بقلم الأستاذ.. وحيد علي الجمال..
( الشعر حلال )
حرام الشعر يا أهل الشعر
و لا حلال ؟!
يوماتي أصحى مع مراتي
على موال
بإن الشعر وكتابته
دا يبقى حرام
غواية و فسق م الآخر
دليل واضح من القرآن
مفيهشي جدال
غلبت أشرح وأفهمها
بإن الآية تفسيرها
مهش لازم يكون
حرفي كما فهمتي
دا فيه أسباب
لازم نعرف في مين نزلت
و إيه الحكمة م التنزيل
و إن الآية كات تقصد
بإن الكذب في الشعرا
دليل واضح على نفاقهم
زمان الآية تقصدهم
مهش يعني على التعميم
و فيه أصلا بقى إستثنى
على المطلق و شرط أكيد
بإن الشاعر المؤمن
مهش منهم
و لو حتي و سلمنا على فهمك
بإنه صحيح
ف ربك حط في الآية
لهم أوصاف عشان أحكم
إن أنا منهم
لازم تظهر و تتحقق
و تبقى أكيد
رسول الله قبل منهم
و قربهم و حارب بعض
أعدائه
بنظم الشعر يسحرهم
قصايد سيف بتقتلهم
و بتغظهم و تبهرهم
و توصف حب أصحابه
لدين الحق و كتابه
فتخرج تاني و تقولي
و هو الحب في الأشعار
د يبقى جهاد
فأقف ساكت و متعجب
د بيت القصد و المعنى
حرام الحب في قصيدة
و تتغزل لمحبوبة
و توصف شكل لعنيها
تقول عنها و تشجيها
يرددها كدا غيرها
و معنى يفسروا معنى
و تدخل جملة اللعنة
و ممكن تاني تسمعها
فتخطف قلب أحلامي
و هو الشعر إيه يعني
غير المكتوب في وجداني
و إحساسي
و حالة بوصِفك فيها
و أخلي الليل يغنيها
و يعشق كحل معانيها
و غيرها بلعن الظالم
و بان عنده كدا مسالم
بدون تفسير و لا تحديد
يخدها غيري يفهمها
بمعنى جديد
و رمز القصد في رسالة
لكل لبيب بيفهمها
و يحفظها بدون تشويش
و معناها و تأويلها
على التشويق
و بطن الشعر للشاعر
دا بير أصلا و قعره
غميق ملهشي حدود
حرام الشعر يا أهل
الشعر و لا حلال ؟!
و مين يفتي على حبي
بإنه حرام
فترجع تاني و تقولي
أنا اتلخبطت صدقني
و مش قادرة أفسرني
و صحباتي عليك ديما
بتحسدني
على إنك بقى شاعر
و عشقي فيك بقى واعر
و أنا في جنة من الآخر
مع نفسي بمصمص غيظي
بشفايفي
و أقول ع القهر حاسدني
و أخبي الدمع في النني
و صمته في وشي يحولني
يقولي كلام يفرحني
و قلبه جنة تحضني
و جوه الشعر يتمخطر
بأوهامه واوجاعي
ويعمل فيلم متصور
ملهشي أفيش
بكلم نفسي من خيبتي
دا جوزي مخاوي كام جني
و عايشة معاه كما الدرويش
يحب يصوم مع ديوانه
و يفطر جوه أحزانه
مع الحرافيش
و أنا بسأل كدا تاني
حرام الشعر يا أهل
الشعر ولا حلال ؟!
وحيد علي الجمال
...........................
تعليقات
إرسال تعليق