.... ابن الشهيد💐
الكاتب_ الشاعر أ. عماد الالفي
🍀🍀🍀🍀🍀🍀🍀🍀🍀
* ابن الشهيد *
عماد الألفي _ مصر
*********
أنا ابـن الـشـهـيد
ابن البطـل الـفـقـيد
حامي الحِمَـى اللي كان
أشـد من الحديد
برصاصِة غَدر خاينـة
وِقِـع البطـل شـهـيد
سابلي دموع عينية
وفي قلبي نار بتقِيد
ضِحكِـي وأفراحي ضاعـوا
وفِكْـري لِـيـل شَـرِيد
وبَـقِـيت مِن يُوم وِداعُـه
بَقِـيت ابن الـشـهـيد
أنا ابن الـشـهـيد
أبي كان أوْفَـى خِـلِّـي
وكان شَمْسِـي وضِلِّـي
و يامَـا كان بـيقـوللـي
حَـقّ الوطـن علـيـنـا
نصـونـه و نـراعِـيـه
فِـرِحـنـا أو أسِـينـا
دا واجـبـنـا عَلِـيـه
وانا شُـغـلـتـي أحمِـيـه
وقـت الخـطـر أفـديـه
مَـهْـمـا يكـون الـتَّـمَـن
دا أي شيء في الكون
لو ضاع ضياعه يهون
إلا ضـيـاع الـوطـن
كلامـه لِـسَّــة في ودنـي
من يوم ما راح وسابني
من يومها وهبت نفسي
فِدا تـراب الـوطـن
في حُـبُّـه أموت شـهـيد
مانـا ابن الـشـهـيد
ياوالـدي يابَــطَـل
ياللي غدر اتـقـتل
أبدًا مهـمـا حَـصَل
مش هفـقـد الأمل
أوعِـدك إنـي أحَـقَّــق
حِلمك اللي حلمت بيه
واللي ماكنتش أصدق
إنـي من غِـيرك أجِـيه
واوعدك إني أكـون
فَخـر لـبـلادي وأهـلـي
واخلي كل الناس تقول
الـشـهـيد خَـلِّـفْ بَـطَـل
بس أنا نِـفـسي أشـوفك
والمس بإيدي كـفـوفـك
وأجيب عيني في عينك
واحشنـي ومين يجيبك
نفسي أشـوفك يا أبـي
وأهَـنِّـي بـيك قلبي الحزين
نفسي أشوفك مَرَّة واحدة
حتى ولو دقيقـتـين
دقيقة أخدك في حُـضـنِـي
زي ماكُـنـت بـتـاخُـدنـي
وأنا جايـلك من بـعـيد
ودقيقة أبـوسَـك فيهـا
لو حتى أموت بعديهـا
ولا أعيش بعدك حزين
ماملكش غير دعايا
لِـخـالِــق الـبرايـا
إلَـه الـعـالـمـين
يارب ارحـم أبـي
واغفر جمـيع ذنوبـه
واجعل يارب الجـنَّـة
من قسمته و نصيـبـه
واحفـظ يارب مصـر
من شـر اللي يعاديها
وارفـع رايات النصـر
فـوق كل حِـتَّـة فيها
دا ليلـهـا مهـمـا طـال
فيه فجر جاي عليها
شـايل أمـل جديـد
بادئ نـهــار سـعـيد
ومعـاه ابن الشـهيد
أنا ابن الـشـهـيد
أنا ابن الـشـهـيد
تعليقات
إرسال تعليق