الأستاذ... محمد دومو... يكتب....بلارج.
بلارج
(زجل مغربي)
بلارج لي كان عشو بجواري
طار من لمكان مشى وخلاني
لحمام لي طربني زمان بهديرو
هجر لمكان كنت فنهار عشيرو
واش غير طار وتلف الطريق؟!
ولى أنا لي ما صالح ليه صديق
يݣولو لحمام رمز لهنا والسلام
طار ما بقى يصلح ليه هاذ لمكان
نظام لمدينة فقديم كان ملائمو
تبدلات مدينتنا وكلا ونغامو
لا جورة لا اخلاق تلقاها بين لعباد
غير الكره وجري عليا نجري عليك
كان الجار فزمانا واحد من الدار
وحتى بلارج كان جار لناس كثار
يعشش فالصمعة العالية طالب الخير
كثرة لباق والضواو جعلتو يطير
طبيبت كانت عايشة حاضرة معانا
ديما موجودة تݣول وحدة من الدار
حتى النحل ما بقى كيف ذاك الزمان
كثر الدبان والشنيولة فهاذ لمكان
لمدينة تبدلات رجعات كلها زواق
بلا معنى يا لفاهم راه الزواق يطير
الريضات رابت ومشى معاها الخير
تحولات برتمات ناسها مزاحمة كثير
-بقلم: محمد دومو
-مراكش/ المغرب
تعليقات
إرسال تعليق