الأستاذ.. يحيى حسين.. يكتب...اصل الحكاية.
اصل الحكاية
بقلمي يحيى حسين
كل شيء اتولد
لازم يكون ليه نهاية
الحكاية هي هي
نفس النهاية والبداية
الحكاية فينا دايرة
وإحنا بنرسم دواير
يوم بنحزن ويوم بنفرح
ومعاهم العمر داير
وما دام العمر بيجري بينا
وإحنا ع الشط وع السفينة
ليه بنعمل الغلط
ونقول يا حيطة دارينا
ونحدف غيرنا بالظلط
وفيها ايه لو بيه بنينا
فيها إيه لو أبقى مركب
وتبقي ليا فجر و فنار
فيها ايه لو كوكبي
يلقى عندك مدار ودار
لو في يوم جمعنا الفلك
ما كان جعان في يوم هلك
كنا حققنا العدالة
كنا عدلنا الميزان
كانت تموت بنا الندالة
ويترد لينا الامان
كان يسود بينا السلام
ويرجع لنا سرب الحمام
راجع معاه غصن الزيتون
ونهد الأسوار و السجون
نزرع مكانها الانسانية
ونخضر دنيتنا ديه
صحيح ده إللي في بالي
كلام يبان جد و مثالي
حلم رسمته في خيالي
رسمته بنبض القلوب
عالم من غير ذنوب
مافيه دخان حروب
ولكنه وهم جميل
دايما قاتل . دايما قتيل
دايما قابيل. دايما هابيل
هي كده الحياة
فيها خير وفيها شر
فيها من زرع الحياة
وفيها واحد على
الموت أصر
خلقها رب العباد
دار ابتلاء وهناك ميعاد
ساعتها حيكون الحساب
ويرجع حق اللي اتظلم
وساعتها حيدوق العذاب
كل واحد في يوم ظلم
هي دي أصل الحكاية
خلي بالك من ختامك
وبص لنفسك في المراية
واوعى تنسى يوم قيامك
يحيى حسين القاهرة
25 يناير2019
تعليقات
إرسال تعليق