الشاعرة.. تهاني بركات.. تكتب... بين قوسين.
بين قوسين .....
كلمتين مش مفهومين
عمر ضايع من سنين
بين قوسين .....
كام ذكرى حلوة للميتين
أصل اللي ماتوا
مش بس اللي لبسوا الكفن
اللي ماتوا
ماتوا في قلوب صابها العفن
و أهي دنيا مليانة محن
حتى الحروف جوه الحكاية
لابسة توب اللي اندفن
و اللي اندفن حاجات كثير
مالهاش تمن
كراكيب جوه بوابة الزمن
عاملة أزمة في المرور
و الشطارة إنك تعدي
من غير ألم
من غير ما تحكي مين ظلم
بين قوسين ......
كام علامة واخدة شامة
و السؤال رافض إجابة
ليه حياتنا ناقصة حاجة
كل حاجة
الحياة مجرد إقامة
شوية سنين
ممنوعة فيها الابتسامة
و الشهامة و الكرامة
المروءة واخدة رُكنة
و الوقاحة فاتحة سكة
و المحبة لازمها لزمة
أصل المحبة مش كفاية
بين قوسين ....
الصح فين
و الحق في دنيتنا
معموله كمين
مين الغلطان مين الزعلان
ما تقولي مين
بين قوسين ....
ولادنا عايشين تايهين
جوه الزنزانة الزرقا
الوضع مخيف
و عالمهم كله تزييف
م الفيس للتيك توك
يا لطيف
و دماغهم مليانة تخاريف
بين قوسين ....
تهاني بركات ٢٥ /٤ / ٢٠٢٣
تعليقات
إرسال تعليق