شبح اليأس.. بقلم الشاعر.. علي عبدالرحيم محمد.
شبح اليأس
٠٠٠٠٠٠٠
ماعدتش فارقة
تغيم تمرر تعتم
يزورنا الضيق ويخذلنا الطريق
وتغزلنا السنين دقات علقم
والحلم يموت ومن الفرح نتيتم
عايز ايه من دنيا فانية
كارهة الطيبة غاوية العيبة
وللردي وابن الردي عاشقة
ماعدتش فارقة
يشيخ الحشا من الحزن
يبيع الضنا دفا الحضن
يضيع الهنا ويبكي العكاز
على نفوس كانوا عوزاز
وخاب فيهم الظن والاحساس
وتبكي ليش ياعكاز
كنت فاكرهم ملايكة
طينة ادم فيها القشرة و الماس
فيها ابن ابليس وابن الناس
وابن الحكاوي الجارحة
تبكي ليش ياعكاز
ماعدتش فارقة
اكتر لحظة ف حياتي
محتاج فيها الزهايمر
محتاج انسى اسمي ورسمي
محتاج انسى انت وانتي
والصبح اللي طالع مكسور
من كحلة ليلك انتي
وابني بيني وبين افكار ومشاعر
كل الوشوش والنفوس ألف سور
واداوي وجع حياتي ب سكاتي
اكتر لحظة ف حياتي
محتاج فيها الزهايمر
يسجن كل اهاتي
ويبعد شبح اليأس عن دقاتي
وتلبس اوقات حياتي
توب الهدوء وتدوق
طعم راحة البال الساكنة
تغيم تمرر تعتم
يزورنا الضيق ويخذلنا الطريق
وتغزلنا السنين دقات علقم
ماعدتش فارقة
شبح اليأس
بقلم علي عبدالرحيم محمد
تعليقات
إرسال تعليق