د.. علي مسلم عجمي.. يكتب...المرأة و الخيانة.
(المرأة و الخيانة ). للشاعر الدكتور علي مسلم عجمي
------------------------
لا تعاند المرأة السما بِتعوّفك
حافظ عليها بتِكرمك و تشرّفك
لكن عليها تحب مَرأة تانية
نجوم السما وقت الظهر بِتشَوفك
طالما حبتك ليش إنت تخونها
حافظ عليها و احترمها و صونها
لما تعاملها بمودة و إحترام
مجنونتك بتصير مش مجنونها
يمكن بكلمة واحدة معها تصير
جفونها و رموشها تجبلك سرير
بس أوعا تخونها..رح تتركك
و لو كنت كل الأرض فارِشها حرير
ممكن المرأة تغض نتفي بالنظر
و تطنش بهفوات لو منك بَـدَر
لكن عليها تحب مرأة تانية
و تخونها..توقَّـع أساليب الضرر
لو حبتك بتطلعك سابع سما
و تفهم عليك و لو بتحكي بالوما
لكن حذاري عا كرامتها تدوس
و تعمل عليها ذكي إما تِظلما
ما تضحك عليها إذا قلبك قَسى
ما سمعت عن كيد النِسا الما بينتسى
مهما يا شاطر بالذكا تعمل فهيم
بتفشل ألف مرة عند كيد النسا
ان غضبت عليك المرا بدك يا حلو
تصللي الجمعة الأحد و بدون الوضو
إلا الخيانة ما بتغفرها المرا
و باقي ما بقى بالذكا بتتحملو
طالما ناوي تعيش عمرك مع مرا
راكزة و متل الكتاب بتنقرا
المرا متل الجوهرة و أغلا ثمن
حافظ عقيمتها تا تبقى جوهرة
الشاعر د. علي مسلم عجمي
لبنان
تعليقات
إرسال تعليق