سجـرة توت.. بقلم الشاعر..معوض حلمي.
.............. سجـرة توت .............
مـن كام سنه داير كـما الدرويـش
غريب ومحتاح الدوا والفرشه خيش
مـن كـام ســــنه تـايـه وانـا
سجين بيدور ع الهوا علشان يعيش
من كام سـنه عايـش بامـــوت
نفس الشوارع والملامح والبيوت
بياع بيبيع الهوا حتى السمك ف البحر
ع النوته زاد القهر وكرشه زي الحوت
من كام سنه حلمي الوليد اندفن
والحــارة ملـت م الكآبه وم العـفن
واقف محصل للزباله ، معاه شرشره
طالب حساب المقبره ، وتمن الكفن
من كام سنه كان عندي سجرة توت
قالولي دي ملكنا ، هاتسيبها والا تموت
وازاي ميراث الغيط عن جد جد الجد
ياخدوه بوضع اليد ويحسبوك هلفوت
من كـام ســنه كان لسه فينا ضمير
نرمح مالينا الهنا مانخافش ريح أمشير
كان فيه شهامه في البوادي والحضر
كان فـيه بشــــر ، بيداووا جرح الغير
من كام سنه وأنا شاهد على الخيبه
نزرع غيـطان الهـنا لخـلق هليــبه
تجار يبيعوا البشر ف السوق كما السلعه
بينشفوا الترعه ، ويحـللوا العيـبه
من كام سنه قبل الشاشات والنيش
الجورن بيلمنا ننسى الهموم ونعيش
دلوقتي زاد الخوف بعد الأمان ف العش
منعوني اجيب القش واخبز ف فرن العيش
ـــــــــــــــــــــــــــــــــــــــــــــــــــــــــــــــ
بقلمي خون أنوب الجديد معوض حلمي
منشأة بطاش .. تمي الأمديد .. دقهلية
تعليقات
إرسال تعليق