الشاعر.. محمد دومو.. يكتب.. مسافر لهيه.

 مسافر لهيه!

(زجل مغربي)

ما بين السما ولرض..

لهيه.. بعيد..

سافر فيوم خيالي

ما بين لبحر والغيمة..

لهيه..واش فالما ولا فالسما!!

فوݣ حدود الشوفة 

مشيت نتسكع..ونبحث..

مشيت وحدي غضبان 

حامل ورقة وقلمي سلطان

نزمم لي جاني من لكلام

بوح يخرج من قلبي بالتمام

محلاها تفويجة لهيه..

نتمتع بين لحروف ونختار

زهور وورود تزين كلامي 

ما بين الارض والسما لهيه..

غفلاتني ورماتني الموجة

تسحرت بالحروف

تهت بزااف فهبالي

بوهالي.. سافرت بخيالي

لهيه بعيد.. أكثر من لقياس

مصاب غير نرتاح بالمعاني

مكتوب يتسرد كلام ݣدامي

وأنا باقي لهيه.. تايه ومسافر 

هبيل..دالح بين لحروف ولمعاني

قصيدة تتشكل وباقي غير غادي

نعثر ونجمع الوقفة عاود ثاني

نكمل بيوت قصيدتي 

نحكي حكايات أيامي

نتحرر.. والغيمة تنزل ما(ء)

ويورد جواد خيالي..

يطفي لعطش بكلامي..

-بقلم: محمد دومو

-الصويرة/ المغرب (12 / 07 / 2023 )