....حرب🖤
الكاتب_ وليد حسنين_ يكتب
🍃🍃🍃🍃🍃🍃🍃
حرب
الفراولة
للبلياتشو!!!!!
تعبت من المحاولة تعبت من القلق
داخل حرب الفراولة بمشاعر من ورق
تعبت من المحاولة تعبت من الفشل
الناس غش ومزاولة وانا نايم في العسل!!!
تعبت من المحاولة تعبت من البشر
الدنيا للمغامرة أبدًا مش للكسل!!!!
ضارب حياتي بيادة لا كيف ولا مزاج
وبحب الناس زيادة والحُب ملوش علاج!!!
عاشق انا ميادة صوتها صداه احساس
ياخدك لدنيا بعيدة فيها المعاني أساس
صوتها كأنه عيد لؤلؤ ياقوت او ماس
فيه الليالي تعيد اجمل ماعاش الناس!!!
عبيد ولا سادة مفيش فينا ملاك
تكرار صبح ك العادة ماشيين على الأشواك
عايشين بكل بلادة ونصاحب الفراق
يناولنا فكرة سادة نضحكله ب اشتياق!!!
اسمي ياناس شحاتة وحبيبتي بدر بدور
قالتلي اسمي غادة وانت القمر والنور
عتريس ولا فؤادة الفكر بقى مشغول
راحوا لطبيب في عيادة سألوه عن المجهول!!!!!
قال الطبيب لشحاتة ماشي ب طريق مهجور
جوازكم خير وعبادة والعرف شرطهُ مهور
نطقت وقالت غادة جينا الحياة في شهور
جوازة ولا غتاتة مشاعرنا تهدم سور
الرب وحده قيادة واحنا البشر مأمور
عيشوا الحياة بسعادة تحصد ورود وزهور
ضحك الطبيب لشحاتة قاله مافيكش كسور
يسلم لسانك غادة انثى الرؤى والحور!!!
الدنيا إيه غير جولة مهزوم او منتصر
حلبة جنون ومناورة عتاولة بتنكسر
ترجع في تاني جولة تنادي بعتذر
عيون الناس مشاورة الخايف ينتظر
عارف انت يا آدم وانتي ياحوا كمان
إن الدنيا محاورة كل اللي عاشها جبان
واحنا يادوب محاولة احنا بني الإنسان
وشهود حرب الفراولة كل اللي عاش انسان !!!!!
قصة
شعرية
للبلياتشو
وليد حسانين
٢٧/٧/٣٠٣٣
القاهرة مصر
تعليقات
إرسال تعليق