الأستاذ.. وحيد علي الجمال.. يكتب...لما اموت.
لما اموت....
لما اموت اوعي تخافي
حضن قلبي رغم موتي
لسه دافي.. احضنيني
اشبعي كتير من ملامحي
قبل ما امشي اوعي تشكي
اوعي يسمع مرة صوتك
حد غيري
اوعي آخر حاجه بينا
تزعليني
جوه نني العين وروحك
استريني
اوعي سر يكون مابينا
و تفضحيني
غرقي بدمعك جبيني
اغسليني
سامحي قلبي وبطهارتك
اشفعيلي
ده الغياب هيطول مابينا
خلي ايدك جوه ايدي
لملمي الحب اللي فاضل
من وريدي
اوعي بس تغطي وشي
قبل ماتبوسي جبيني
صدقيني هتوحشيني
دَخَّلي ولادي عليا
جنب مني قعديهم
قبل ما امشي
من وجودي شبعيهم
اوعي مرة تزعليهم
واحكي عني وكلميهم
اعذريني وفهميهم
اني كنت بقلب طيب
مش بخيل أبدا عليهم
صدقيني هتوحشيني
اوعي تنسي وتحرميني
من دعاكي
لو لاقيتي الخير في بابك
اشركيني
قولي كان عايش حياته بالتوكل
كان في حاله مهما تتغير حالاته
كان بيرضى ويبقى راضي
لو في مرة جيت في بالك
اوعي تنسي دعوة حلوة
وف سجودك كتريها
كل ضلمه جوه قبري
تنوريها
قولي كان صادق في وعده
مهما ظَرفُه كان يعانده
كان له لمسة طَيِّبَة
كان مخلي نفسه شمعة
اي حاجة مستحيلة
تبقى عنده قُرَيِّبَة
صدقيني هتوحشيني
يالي طول عمرك في قلبي
نسمة هادية وطيبة
وحيدعلى الجمال سرس الليان محافظة المنوفية جمهورية مصر العربية
تعليقات
إرسال تعليق