الأستاذ... جمال زكى عينر... يكتب...خلاص ماشي.
( خلاص ماشي ؟ ) :
خلاص ماشي ؟
خلاص لملمت أغراضك وناوي تروح ؟
وتهجرني وتنساني
تشمت فيا عزالي
وتسلبني الحياه والروح
تروح لبعيد
بعيد جداً وتسلاني
وتنسى زماني ومكاني
تفوتلي آلام وضيم وجروح
خلاص
خلاص حتسيبني وتهاجر ؟
ولو حنيت في يوم ترجع
وقابلتك وكلمتك
تقوللي بجد مش فاكر
وتنسى العشرة والايام
وتنسى الذكرى والأحلام
وتكسر قلبي والخاطر
خلاص قررت ؟
خلاص قررت وبقسوة
وخوفي ولهفتي ف بُعدَك
ما بتأثر ولا بتسوى
ومش فارق معاك أحباب
ولا صحابك ولا العزوة
فلو فاكر هناك جنَّة
وحتلاقي التراب حِنَّة
فكان غيرك زمان أشطر
ما كانش يعود ويتمخطر
ويبحث تاني عن أرضه
ما يلقاش فيها محبوبه
ولا نقشة ف قماش تُوبُه
نِشِف عوده اللي كان أخضر
يا ريتك
يا ريتك عِدت حساباتك
وايه حيكون وايه فاتك
وفكرت بهدوء حبة
وكنت راجعت أوقاتك
ورتبت ف حكاياتك
ولو حتى تكون كدبة
يا ريتك
يا ريتك كنت تخدعني
بضحكة زيف تودعني
وتعمل شاري ما تبيعني
وِسِبت من الوداد نسبة
وِسِبت من الوداد نسبة
بقلمي الشاعر جمال زكي عينر
تعليقات
إرسال تعليق