قلبي بيرقص بقلم زينب سليم أحمد
(((❤️ قلبي بيرقص ❤️)))
===================
قلبي معاه بيطير م الفرحة .. وبيرقص على صوت دقاته
واحلم إني عروسة بطرحة . . . واني حبيبته وكل حياته
وبشوف نفسي وانا وياه . . عايشة في حلم انا بتمناه
وسنين عدت بستناه . . . . يسعد قلبي بكل حالاته
ياما انا عشت كتير أوقات . . ولاشاف فيها القلب سعادة
كنت يادوب بسمع دقات . . . ولا كان فيها دقة زيادة
بس عيوننا لما اتقابلوا . . . . دقات قلبي زادت قبله
وبقيت شمس حياته وضله .. وفرحة قلبي صبحت عادة
لفي يادنيا معانا بفرحة . . . خلي قلوبنا تملي سعيدة
خلي جناين حبنا طارحة . . . أجمل حلم ونسمة وليدة
ياما شبعنا سنين حرمان . . . دوقنا المر اشكال وألوان
عدى علينا كتير أحزان . . وياما حلمنا بدنيا جديدة
حاسة إني في أجمل حلم . . . من كتر حلاوته وجماله
حد يقولي الجنة دي علم . . . هانعيش فيها عُمر بحاله
احنا قلوبنا خلاص اتواعدوا . . وبإخلاص وبحب اتعاهدوا
أى طريق للبُعد هاسدوا . . أصلي انا عشت احلم بوصاله
==============================
بقلم // زينب سليم أحمد ......
تعليقات
إرسال تعليق