أمك وابوك بقلم محمد أبو إسلام
أمك_وابوك
أمك وابوك بستان حنان بيدللِك
شط وأمان لمّا الزمان ..
يقسى عليك ويبهدلك
طوق النجاة جوه الحياة ...
طول ما انت عايش دنيتك
همّا الطريق لنعيم وجنة في أخرتك
همّا البدور لو يوم تضلم سِكتك
برموش عينيك حوّط عليهم . برهم
طبطب ودايماً حِن واسعى وودهم
اياك في لحظة جهل فجأة تصدهم
اياك شيطان ييجي يوزك ضدهم
فيه حب زي حبهم !!؟؟
فيه حد حبك زيهم !!؟؟
فيه نور بيشبه ضيهم !!؟؟
اسأل عليهم داانت نبض قلبهم
قبل الحنين قبل الآهات
قبل الدموع والغربة اللي في بُعدهم
رتب حياتك خلّي هدفك عِزهم
اركب بساط الريح تملّي وروحلهم
ملّي العينين حب وحنان
اسبح و عوم في حضنهم
بوس الجبين . بوس الإيدين
وطّي وبوس على نعلهم
في الدنيا ممكن الحبايب يخدعوك
وارد تلاقي ناس كئيبة بيحسدوك
جايز صحابك مخنوقين وبيكرهوك
قارن ما بينهم واللي دايماً يسندوك
اللي عشانك داقو مر وكبّروك
اللي في طفولتك شالوا همك علموك
زرعوا السعادة جوه قلبك فرحوك
باعوا الرخيص باعوا النفيس
صانوك يا غالي وطمنوك
يا ميت خسارة لو أبالسة وشوشوك
مالت دماغك سرقوا عقلك ضيّعوك
خدعوك في ثانية وورطوك
خلوك بتنسى فضل أمك أو أبوك
محمد_أبو_إسلام
تعليقات
إرسال تعليق