الفلاحه زمان بقلم حسين ابراهيم سالم
( الفلاحه زمان)
يا زمن النهارده روح وهات
زمن الفلاحه أم طرحه وجلابيه اللي طلعت علماء ومعلمين
ووزراء ومستشارين
ولا قرت ولا كتبت
وكانت مدرسه وجامعه ووزارة تربيه
اللي كانت بتصحى بدري
ساعة الفجريه
تحلب وتخض وتكنس وتصحي ولادها
وتلبسهم يروحو المدرسه الصبحيه تولع الفرن وتخبز رميت بتاو
ومعها سلفتها سعديه
والواد عبد الله الصغير يلعب حواليهم وفي إيده حته عجينه
يعملها حصان وعروسه لإخته هديه تخلص بدري بدري
وتجيب صرتها تحط فيها كام بتاوه على حتتين جبنه قديمه
من البلاص وتقوم شدا حيلها ورايحه الغيط لابو عبد الله ساعه الضهريه
وابو عبد الله ينادي على جيرانه في الزرعه
المقدس شنوده والحاج عطيه
تعالوا يا رجاله
دى لقمه هنيه تكفي ميه
يجى المقدس شنوده في ايده
كام بصلايه
ويجيب حبتين طماطم الحاج عطيه
يسمو بسم الله
ياكلو
وسيرة ابو زيد كانت الغيه
مع كوباية شاي
بعد الغدا على نار الحطب
وكل الهموم منسيه
لكان حد يشكي ضغط
ولا سكر ولا ذبحه صدريه
واخر النهار تلم صرتها
وفيها حبتين طماطم
على كام بصلايه
وقرنين فلفل وكام بتنجانة
الله على حلة مسقعه في العشيه وكانت تغرف طبق وتنادي على البنت هديه
خدي الطبق دا وديه لجارتنا ام ماريه.
آه
يا زمن النهارده روح
وهات زمن الفلاحه أم طرحه وجلابيه.
(حسين ابراهيم سالم)
تعليقات
إرسال تعليق